(ខេត្តមណ្ឌលគិរី)៖ នៅព្រឹកថ្ងៃទី២៥ ខែធ្នូ ឆ្នាំ២០២៥ លោក ជាក់ ម៉េងហ៊ាង អភិបាលរង នៃគណៈអភិបាលខេត្ត បានអញ្ជើញដឹកនាំកិច្ចប្រជុំដ៏មានសារៈសំខាន់ និងមានអត្ថន័យយ៉ាងជ្រាលជ្រៅ ក្នុងការបង្ហាញលទ្ធផលនៃការសិក្សា និងការវាស់វែងទីលានទុកដាក់សំរាមថ្មី ដែលស្ថិតនៅភូមិស្រែអី និងភូមិពូត្រុំ សង្កាត់មនោរម្យ ក្រុងសែនមនោរម្យ។
កិច្ចប្រជុំនេះបង្ហាញយ៉ាងច្បាស់ពីចក្ខុវិស័យមើលឆ្ងាយឆ្ពោះទៅអនាគត និងការដឹកនាំប្រកបដោយការទទួលខុសត្រូវខ្ពស់របស់ថ្នាក់ដឹកនាំខេត្ត ក្នុងការគ្រប់គ្រងបញ្ហាសំរាម និងការការពារបរិស្ថានជាទីមូលដ្ឋានសម្រាប់ការអភិវឌ្ឍសង្គម-សេដ្ឋកិច្ចប្រកបដោយចីរភាព និងសុខុមាលភាពប្រជាពលរដ្ឋ។
ដោយមានការចូលរួមពីលោកនាយករង រដ្ឋបាលសាលាខេត្ត លោកអនុប្រធានមន្ទីរ អង្គភាពពាក់ព័ន្ធ លោកអភិបាលរងក្រុង និងមន្ត្រីជំនាញពាក់ព័ន្ធ កិច្ចប្រជុំបានដំណើរការឡើងក្នុងបរិយាកាសវិជ្ជាជីវៈខ្ពស់ សាមគ្គីភាព និងការសហការយ៉ាងជិតស្និទ្ធ ដើម្បីពិនិត្យ និងវាយតម្លៃលទ្ធផលសិក្សា និងការវាស់វែងទីតាំងឲ្យបានត្រឹមត្រូវ តាមស្តង់ដារបច្ចេកទេស និងគោលការណ៍បរិស្ថាន។ ថ្នាក់ដឹកនាំខេត្តបានលើកសរសើរ និងវាយតម្លៃខ្ពស់ចំពោះកិច្ចខិតខំប្រឹងប្រែងរបស់អង្គភាពជំនាញ និងភាគីពាក់ព័ន្ធទាំងអស់ ដែលបានអនុវត្តការងារយ៉ាងម៉ត់ចត់ បង្ហាញពីសមត្ថភាពវិជ្ជាជីវៈ ការស្មោះត្រង់ និងការយកចិត្តទុកដាក់លើផលប្រយោជន៍សាធារណៈជាលើកដំបូង។
កិច្ចប្រជុំនេះត្រូវបានចាត់ទុកថាជាជំហានយុទ្ធសាស្ត្រដ៏សំខាន់ ក្នុងការបង្កើតមូលដ្ឋានរឹងមាំសម្រាប់ការរៀបចំទីលានទុកដាក់សំរាមថ្មី ឲ្យមានប្រសិទ្ធភាព ស្តង់ដារ និងចីរភាព ដែលជាផ្នែកសំខាន់ក្នុងការលើកកម្ពស់ភាពស្អាត អនាម័យ និងបរិស្ថានរស់នៅល្អប្រសើររបស់ខេត្តមណ្ឌលគិរី ស្របតាមទិសដៅអភិវឌ្ឍន៍ជាតិ និងការកសាងសង្គមប្រកបដោយសុខសន្តិភាព និងចីរភាព។ កិច្ចប្រជុំនេះប្រព្រឹត្តទៅនៅសាលប្រជុំសែនមនោរម្យ អគាររដ្ឋបាលខេត្ត៕អត្ថបទ ដោយ ឃិន សុខន
Post a Comment