រដ្ឋបាលស្រុកអូររាំង បន្តបង្ហាញស្មារតីដឹកនាំនិងទទួលខុសត្រូវខ្ពស់លើការងារបរិស្ថាន និងសង្គម!

(មណ្ឌលគិរី)៖ នាព្រឹកថ្ងៃទី៥ ខែមករា ឆ្នាំ២០២៦ រដ្ឋបាលស្រុកអូររាំង  បានបន្តបង្ហាញយ៉ាងច្បាស់នូវស្មារតីដឹកនាំប្រកបដោយមនុស្សធម៌ខ្ពស់ ការយកចិត្តទុកដាក់ពិតប្រាកដ និងការទទួលខុសត្រូវលើសុខទុក្ខប្រជាពលរដ្ឋ ដោយបានចុះសួរសុខទុក្ខ និងនាំយកអំណោយមនុស្សធម៌ដ៏មានន័យជ្រាលជ្រៅ ជូនដល់ក្រុមគ្រួសារវិរកងទ័ពការពារព្រំជួរមុខ ចំនួន ១៤ គ្រួសារ នៅឃុំដាក់ដាំ ស្រុកអូររាំង។

ក្រោមការដឹកនាំ ដ៏ពោរពេញដោយមេត្តាករុណា របស់ លោកឌុន សុខា ប្រធានក្រុមប្រឹក្សាស្រុក និងលោកសៀក មុន្នី អភិបាលនៃគណៈអភិបាលស្រុក សកម្មភាពនេះមិនមែនជាការចែកអំណោយធម្មតា ប៉ុន្តែជាការបញ្ជាក់ពី “បេះដូងសេវាសាធារណៈ” របស់ថ្នាក់ដឹកនាំ ដែលតែងដាក់ប្រជាពលរដ្ឋ និងអ្នកលះបង់ដើម្បីជាតិ ជាចំណុចកណ្ដាលនៃការគ្រប់គ្រង និងអភិវឌ្ឍមូលដ្ឋាន។

ការចូលរួម របស់ថ្នាក់ដឹកនាំស្រុក មន្ត្រីរាជការ កងកម្លាំងទាំងបី និងអាជ្ញាធរមូលដ្ឋាន បង្ហាញឲ្យឃើញពីសាមគ្គីភាពរឹងមាំ វិន័យការងារខ្ពស់ និងឆន្ទៈរួម ក្នុងការបម្រើសង្គម ដោយឈរជាប់ជាមួយអ្នកដែលកំពុងប្រឈមការលំបាក។

អំណោយមនុស្សធម៌ និងថវិកាដែលបានផ្តល់ជូន គឺជាការសម្រាលបន្ទុកជីវភាពជាក់ស្តែង ជាពិសេសសម្រាប់គ្រួសារវិរកងទ័ព ដែលបានលះបង់កម្លាំងកាយចិត្ត ដើម្បីការពារអធិបតេយ្យភាព និងសុវត្ថិភាពដែនដីជាតិ ខណៈដែលក្រុមគ្រួសារនៅខាងក្រោយ ត្រូវប្រឈមបញ្ហាសេដ្ឋកិច្ច និងបំណុលឥណទាន។

ក្នុងឱកាសដ៏មានន័យនេះ ថ្នាក់ដឹកនាំស្រុកបានសម្ដែងការគោរពកោតសរសើរ និងដឹងគុណយ៉ាងខ្ពង់ខ្ពស់ ចំពោះវីរភាព និងការលះបង់របស់វិរកងទ័ពជួរមុខ ព្រមទាំងបញ្ជាក់យ៉ាងច្បាស់ថា រដ្ឋបាលស្រុកអូររាំង នឹងបន្តឈរជាប់ជាមួយប្រជាពលរដ្ឋ និងក្រុមគ្រួសារវីរបុរសជាតិ មិនទុកឲ្យពួកគេដើរតែម្នាក់ឯងក្នុងការលំបាកឡើយ។

សកម្មភាពនេះ ជារូបភាពបញ្ជាក់ពីការដឹកនាំដែលមានចក្ខុវិស័យ មនុស្សធម៌ និងទំនួលខុសត្រូវខ្ពស់ របស់រដ្ឋបាលស្រុកអូររាំង ដែលកំពុងកសាងទំនុកចិត្ត សាមគ្គីភាព និងកម្លាំងចិត្តដល់ប្រជាពលរដ្ឋ ក្នុងការរួមដំណើរអភិវឌ្ឍស្រុកឲ្យរីកចម្រើន ប្រកបដោយចីរភាព និងមានសុភមង្គល៕អត្ថបទ ឃិន សុខន