កងទ័ពភូមិន្ទថៃបានបញ្ជាក់ប្រាប់មន្ត្រីកាកបាទក្រហមអន្តរជាតិថាពួកគេនឹងដោះលែងទាហានខ្មែរទាំង១៨នាក់នៅពេលដែលការចរចាររវាងថៃនិងកម្ពុជាឈានដល់កិច្ចព្រមព្រៀងជាមួយគ្នាសិន។ ការបញ្ជាក់នេះគឺក្នុងពេលដែលមន្ត្រីកាកបាទក្រហមអន្តរជាតិបានអញ្ជើញចូលពិនិត្យស្ថានភាពរបស់ទាហានខ្មែរទាំង១៨នាក់កាលពីថ្ងៃទី៤ ខែកញ្ញា។
ក្នុងសេចក្ដីប្រកាសព័ត៌មានរបស់កងភូមិន្ទថៃនៅថ្ងៃទី៥ ខែកញ្ញា ថាពួកគេបានសម្របសម្រួលជាលើកទី២ដល់ក្រុមការងារកាកបាទក្រហមអន្តរជាតិ ក្នុងការចុះសួរសុខទុក្ខទាហានខ្មែរទាំង១៨នាក់ នៅមន្ទីរឃុំឃាំងដែលទទួលខុសត្រូវដោយយោធភូមិភាគទី២របស់ថៃ។ ដោយឡែកពាក់ព័ន្ធនឹងការធ្វើមាតុភូមិនិវត្តន៍របស់ទាហានខ្មែរ ពួកគេអះអាងថានឹងធ្វើទៅបាននៅពេលដែលការចរចារជាមួយកម្ពុជាដោះលែងឈានដល់កិច្ចព្រមព្រៀងសិន។
ក្នុងសេចក្ដីប្រកាសនោះសរសេរថា៖ «ទាក់ទិននិងបញ្ហាមាតុភូមិនិវត្តន៍ឈ្លើយសឹក នេះនឹងត្រូវធ្វើឡើងនៅពេលដែលប្រទេសថៃ និងកម្ពុជាឈានដល់កិច្ចព្រមព្រៀងគ្នាទៅវិញទៅមកលើការដោះលែងអ្នកទោស»។
នេះគឺជាលើកទី២ហើយដែលមន្ត្រីកាកបាទក្រហមអន្តរជាតិបានចុះទៅសួរសុខទុក្ខទាហានខ្មែរដែលត្រូវបានថៃចាប់ខ្លួនដោយបំពានបទឈប់បាញ់នៅព្រឹកថ្ងៃទី២៩ ខែកក្កដា ឆ្នាំ២០២៥។ ក្រោយចាប់ខ្លួន គណៈកម្មាធិការសិទ្ធិមនុស្សបានព្យាយាមតវ៉ាទៅកាន់ឧត្តមស្នងការសហប្រជាជាតិទទួលបន្ទុកសិទ្ធិមនុស្ស និងកាកបាទក្រហមអន្តរជាតិដើម្បីឱ្យមានអន្តរាគមន៍លើរឿងនេះ។
កាលពីថ្ងៃទី១៥ ខែសីហា ប្រធានគណៈកម្មាធិការសិទ្ធិមនុស្សកម្ពុជាលោកទេសរដ្ឋមន្ត្រី កែវ រ៉េមី បានផ្ញើរលិខិតទៅUN ជាថ្មីទៀតដោយរម្លឹកថា៖ «យើងស្វែងរកការចូលរួមរបស់អ្នកក្នុងការរក្សាគោលការណ៍សិទ្ធិមនុស្ស ច្បាប់មនុស្សធម៌ និងយុត្តិធម៌សម្រាប់ជនរងគ្រោះនៃសកម្មភាពខុសច្បាប់បែបនេះ»៕
Post a Comment